Entamáu pola Escuela de Sumillería de la Sidre, desendolcaráse nel Aula de la Sidre del CIFP Hostelería y Turismu de Xixón y va cuntar con auténticos especialistes de la hostelería, la sumillería y la sidre en xeneral
LA SIDRA.- Esti cursu ye una iniciativa pionera de la Escuela de Sumillería de la Sidre, de la Fundación Asturies XXI. Va tener una duración de 20 hores ya impartiráse nel Aula de la Sidre del CIFP d’Hostelería y Turismu de Xixón de magar el martes 11 de marzu, los martes y los xueves n’horariu de 18 a 20 hores. Nel mesmu trataránse aspeutos téunicos, práuticos y culturales pa garantizar una conocencia integral del mundiu la sidre.
L’oxetivu ye consiguir que los alunos llogren les debíes conocencies de la sidre y la so ellaboración, de la tastia y evaluación sensorial, desendolquen les sos competencies personales, habilítense pa certificaciones profesionales y puedan aportar a cursos avanzaos de Sumiller de Sidre nos que yá se ta trabayando.
Hai de destacar que l’acreitación como ‘Sumiller de Sidra’ -nivel básicu- va ser emitíu pola Escuela de Sumillería de la Sidra, de la Fundación Asturies XXI, fundación docente declarada d’Utilidá Pública.
L’acreitación enmárcase dientru de lo que se conoz como ‘Formación ensin reglar’, ello ye, nun ta regulada pol Ministeriu d’Educación y Formación Profesional y, per ende, nun tien validez académica oficial.
Agora bien, esta entitulación permite alquirir competencies téuniques tresversales, llograr certificaos y acreditar hores de formación; pudiendo ser valorada positivamente polos emplegadores en procesos de selección.
L’oxetivu de la Escuela de Sumillería ye llograr nun futuru prósimu la reconocencia d’un organismu públicu oficial, lo que permitiríe que la entitulación fuera homologada, con validez profesional y puntuable n’oposiciones y concursos de tresllaos.
El númberu places nesti Cursu de Sumiller de Sidra ta llindáu a dieciocho persones. Pa poder matriculase nel mesmu ye preciso unviar primeramente un corréu, a manera de solicitú, desplicando la motivación pa faer esti cursu, a la direición adlasidra@gmail.com, o bien al whatsapp 652 594 983
El cursu naguraráse’l prósimu 11 de marzu a les 18 h. na Aula de la Sidra del CIFP Escuela d’Hostelería y Turismu de Xixón, col afayaivos a los participantes per parte de Roberto Suárez, direutor de dichu CIFP y la presentación del cursu al cargu de Marcos A. Fernández, presidente de la Fundación Asturies XXI.
La parte práutica del cursu va correr al cargu de Juan Luis García, Profesor del CIFP Hostelería y Turismu de Xixón, y pol sumiller Ricardo del Ríu.
El conteníu teórico correrá al cargu d’auténticos espertos del mundiu la sidre, escomenzando cola intervención de Daniel Ruiz, Xerente de la DOP Sidre de Asturies y siguiendo pol Caderalgu de Física y Química Miguel Ángel Pereda, l’investigador Enrique Dapena, responsable del Programa de Fruticultura del SERIDA, la química y enóloga Cristina Castañu, Luis Benito García, presidente de la Cátedra de la Sidre de la Universidá d’Uviéu, el llicenciáu en Xeografía y Hestoria y espertu sidreru Donato X. Villoria, la llicenciada en Maxisteriu y miembru del Xuráu del Campeonatu Oficial d’Echaores de Asturies dende l’añu 2020, Laura Ovín, y el llagareru Juan José Tomás, de Sidra JR.
Esti equipu docente confier a ‘Sumiller de Sidra, nivel básicu’ una importante solidez y solvencia.
CURSU / OXETIVOS / PROGRAMA / MATRÍCULA / ACREITACIÓN
