Jerry Buttimer, Ministru irlandés de Mediu Rural y Desendolcu Comunitariu, mostróse perinteresáu na colaboración dientro’l marcu de la Rede Europea de Ciudaes de la Sidre –Cider Cities- y comprometióse a treslladar la información al restu’l gobiernu irlandés
Miembros de la directiva de la Rede Europea de Ciudaes de la Mazana y la Sidre -Cider Cities- ente los que s’alcuentra el sociu fundador y presidente de la Fundación Asturies XXI, Marcos Abel Fernández aconceyaron esta mañana col Ministru irlandés de Mediu Rural y Desendolcu Comunitariu Jerry Buttimer y col conceyal del condáu de Cork, Jack White.
Nesi alcuentru convidóseyos formalmente a participar en Cider Cities, desplicándose-yos con detalle en que consiste esta asociación de ciudades y conceyos productores de sidre per toa Europa y en qué consistiría esta colaboración. Ye de destacar la bona acoyida ya l’interés que la propuesta despertó nos políticos irlandeses, anunciando Jerry Buttimer que va treslladase la información al restu de gobiernu a nivel irlandés, especialmente al senador que trabaya a nivel d’asociaciones rurales y a los representantes del so país nel parllamentu europeu.
A la tardi, la delegación asturiana aconceyó con Moira Murrell, CEO del Ayuntamientu de Cork, con quien falaron de les posibilidaes concretes de collaboración pente los integrantes de Cider Cities.
La selmana que vien continuarán colos aconceyamientos, entregando al presidente de la Cámara de Comerciu de Cork una carta del presidente de la Cámara de Comerciu xixonesa, xuniendo venceyos pente les dos entidaes. Finalmente el martes 25 falarán con Clir Dan Boyle, alcalde de Cork, na casa conceyu.
El caberu actu nel que participarán tien un especial conteníu simbólicu: llantarán un pumar nun tarrén públicu de Carrigaline.
Esti viaxe valdrá pa reforciar el venceyu pente Asturies ya Irlanda, que tien nel conceyu de Cork una de les sos principales fasteres sidreres, potenciando l’avance del sector sidreru europeu comu una comuña.
