Entamu
La temporada sidrera asturiana arrinca agora n’abril con una Primer Sidre L’Añu bien especial, dedicada a la reconocencia pola UNESCO de la Cultura Asturiana de la Sidre, con pregón al cargu de Luis Benito García, director de la Cátedra de la Sidre de la Universidá d’Uviéu, y una de les figures fundamentales p’algamar esta distinción internacional.
Pero hai más, nesta decimoquinta edición, la Primera Sidre L’Añu supérase nos sos conteníos y presenta importantes novedaes, tales como un espaciu específicu dedicáu a conferencies, degustaciones y maridajes de la sidre con otros Alimentos del Paraísu, o la mayor programación musical, con actuaciones de Soipanderetera, Ún de Grau, Rollu Folk o los “Cantares de llagar”, con David Varela.
De xacíu, nun va faltar la sidre de más de 40 llagares, los xuegos y talleres infantiles, la mayada de sidre, los concursos d’echaores aficionaos, el pebidal, la parrilla del Pintxu, la gaita, los xuegos tradicionales, el Sidracrucis, y de xacíu el bon humor y les ganes d’esfrutar de la que ye ensin dulda la espicha más grande d’Asturies.
Un momentu especialmente relevante va ser la entrega de diplomes a la que va ser la primer promoción de Sumilleres de Sidre, que tendrá llugar demientres la naguración de la Primer Sidre L’Añu, una promoción cola que s’empecipia un nuevu periodu de modernización, d’arriquecimientu de la nuesa cultura sidrera afayándola a les meyores científiques y técniques d’anguañu. Un apueste de futuru y progresu qu’abre puertes y xenera espeutatives.
D’otra miente hai de destacar cómo la promoción de la primer sidre del añu, oxetivu que foi la base d’esti eventu, y que nel so momentu paecía un suañu inalfamable, güei ye una auténtica realidá, y ca vegada son más los llagares que comercialicen esta sidre ensin trasegar, llámenla sidre sobro la madre, de pura madre o de primavera.
Tampoco nun podemos dexar de reseñar los postreros avances de Cider Cities, con un esplegue impresionante per Irlanda onde presentaron esta Rede Europea de Ciudaes de la Sidre y la Mazana, al propiu Ministru Irlandés de Mediu Rural asina como a la Cámara de Comerciu, al Conseyu y al alcalde de Cork, persiguiendo asina col procesu d’internacionalización que tan desendolcando.
¡Entama fuerte esta nueva temporada sidrera!
