Entamu
Llegamos al númberu 250 de la revista LA SIDRA cola impresión de que tendríemos que tener entamao dalgún tipu de cellebración por llegar a esta cifra tan icónica, pero paeciómos que cola frenética actividá que se vive nel mundiu la sidre nestos momentos, nun había tiempu nin espaciu p’asemeyada cellebración, que vamos retardar fasta que cumplamos los 25 años d’esistencia… nun queda tantu.
Nestos 21 años que llevamos editando LA SIDRA mes a mes, vimos evolucionar esti mundiu de forma más que notable, asistimos a la modernización de los llagares, la meyora y diversificación del productu, l’aniciu de la DOP ‘Sidre de Asturies’, la ca vegada mayor afirmación social de la nuesa bébora autóctono, el resurdir de los eventos sidreros, de la sidre casero… y sobromanera -y consecuencia en bona midía de tolo anterior- llograr la reconocencia pola UNESCO de la cultura asturiana de la sidre como Padremuñu Cultural Inmaterial de la Humanidá, qu’abre nuevos espacios de desendolcu y qu’ensin dulda tien de suponer un revulsivu en tolos ámbetos.
Cierto que’l consumu de la nuesa sidre -especialmente de la sidre natural- ta xuncíu a la situación socioeconómica del país, y que la desindustrialización supunxo un importante amenorgamientu de la capacidá económica asturiana, y lo que ye infinitamente más grave, provocó que más del 40% de la mocedá asturiano –la más activo social y económicamente pol so rangu d’edá- se viere forzao a emigrar.
Ensin dulda esi ye l’aspeutu más negativu de la nuesa rialidá y el que más afeuta al futuru de la sidre asturiano. Por eso hai que concenciase qu’apostar pola nuesa sidre ye apostar pol nuesu país, y que’l so futuru va amestáu en bona midía a ésti. Por eso ye tan importante la DOP Sidre de Asturies, porque’l 100% del productu revierte na economía asturiana; por eso ye tan importante la reconocencia de la UNESCO, porque fortalez la nuesa identidá y permite faer frente a l’asimilación cultural que carecemos.
Hai que siguir per esi camín, tenemos que siguir apostando polo propio, ensin chovinismos, pero con rixu. Siguir esfrutando de la sidre y saber que con ello tamos faciendo país, asegurando’l nuesu futuru y el de les xeneraciones vinientes.
