El primer premiu foi pa Josep M. Molist, cola so obra “Tres Pomes”; siguiéronlu Ana Pello, con “Espalmando” y Analía Ponikarova cola fotografía “Sidra y cubizmo”; la mención especial JR foi pa Jose Luis Martínez
ENLLAZ A LES OBRES PREMIAES Y FINALISTES
Cuando naide falaba entá de cultura de la sidre, va ya 18 años, surdió esta iniciativa que precisamente se presentaba cola intención de dar otru ámbitu, otra expresión más a lo que yera la cultura asturiana de la sidre, non suficientemente recoyida graficamente, entamando asina un corpus fotográficu que recoyere n’imáxenes la cultura venceyada a la sidre y la mazana.
Asina lo recordó Marcos A. Fernández, presidente de la Fundación Asturies XXI, al entamu de la entrega de premios d’esta 16 edición del Concursu de Semeyes de LA SIDRA. Marcos tuvo tamién pallabres d’agradecimientu a Sidra JR, ensin cuyu padrociniu sedría imposible caltener esti concursu de renome internacional, y a los collaboradores del mesmu, l’Asociación fotográfica Asemeyando y la Sidrería la Galana. Amás, reconoció el sofitu que se recibe nesta y toles aniciatives sidreres que s’entamen en Xixón por parte de la corporación municipal xixonesa, representada nesti casu pol Conceyal de Servicios Sociales, Vivienda y Collaboración, Guzmán Pendás, y Jorge Glez. Palacios, Conceyal de Rellaciones Institucionales.
Pendás reiteró la so bona disposición pa sofitar esti tipu d’eventos y aprofitó la ocasión pa recordar la cercanía del posible reconocimientu de Padremuñu Cultural Inmaterial de la Humanidá ya’l papel que les semeyes cumplieron comu preba gráfica d’esta cultura ante la UNESCO. “La sidre nun se vive solo col paladar, hai algo más, daqué espiritual, intanxible; estes imaxenes que tenemos espuestes son la espresión tanxible d’esi algo intanxible” declaró el conceyal.
Darréu Juan José Tomás, de Sidra JR, fizo entrega del premiu dedicáu al so llagar, consistente nuna insignia especial, cien euros y dos caxes de sidre JR, a Jose Luis Mertínez Camblor, pola obra que lleva el nombe del llagar, principal padrocinador del concursu: “JR”.
El segundu áccesit del concursu, al que se presentaron 59 autores de 16 países, fue entregáu por Marta Menéndez, presidenta de la Federación d’Asociaciones Fotográfiques d’Asturies a Natalia Ponikarova, pola so obra “Sidra y cubizmo”.
El Conceyal de Relaciones Institucionales, Jorge González Palacios, fue l’encargáu d’entregar a Analía Pello el primer accesit pola so obra “Espalmando”. Finalmente, Guzmán Pendás entregó el primer premiu a la obra “Tres Pomes”, del catalán Josep M. Molist.
La sidrería La Galana, al igual que n’años anteriores, convirtióse nel primer establecimientu d’esti añu n’acoyer la esposición coles obres finalistes, que podrán contemplase nel comedor d’esta sidrería los prósimos meses.
