L’ambiente foi inmeyorable n’una xornada con pregón de Luis Benito García, homenaxe a los mineros muertos en Zarréu, y protagonismu del echaor Salvador Ondó, les panderetes de ‘Soi panderetera’ y de los neños y neñes, que participaron en xuegos y talleres
LA SIDRA – Ayeri, a les doce del meudíi, abría les sos puertes la quinceava edición de la Primer Sidre l’Añu, qu’esti añu cellébrase nel recintu Ferial Lluis Adaro (Feria de Muestres).
Como nun podía ser d’otra miente, na inaguración tanto’l pregoneru del eventu, Luis Benito García, como’l presidente de la Fundación Asturies XXI incidieron na importancia qu’esti añu tien pa la sidre pol reconocimientu de la UNESCO. La folixa y les intervenciones apararon un momentu pa recordar la traxedia de los cinco de Zarréu, con una emotiva interpretación a gaita y tambor de ‘El Pozu María Luisa’.
De siguío tuvo llugar la entrega de premios a los trés meyores primeres sidres del añu, La Morena, Sidra Oficial de la PSLA, Prau Monga, de Viuda de Angelón y Sidra Cabueñes. Tamién recoyeron la so reconocencia los miembros de la primer promoción del cursu básicu de Sumiller de Sidra. Solo entós Alejandra Vanegas, acompañada d’Alfonso Prado–llagareru de La Morena- echaron el culín inagural, pa repartir dempués botelles ente los presentes nel escenariu pa qu’echaren el primer culete conxuntu, nun actu cargáu de simbolismu nel que se xunieron llagareros, sumillers, Siceratores, profesores del CIFP d’Hostelería y Turismu, membros del xuráu y representantes de les organizaciones qu’entamen y collaboren nesti eventu.
L’arribación de públicu foi constante dende primer hora de la mañana, esfrutando de los actos, de la barra de sidre, pero sobremanera, de la zona esterior onde los toneles de llibre serviciu y la música nun pararon en tol día.
La tastia de la sidra de La Morena pol presidente del xuráu de la Meyor Primer Sidre l’Añu, Manuel Busto, atraxo a un bon númberu de sidreros interesaos en conocer más y meyor el productu y la presentación el llibru de Salvador Ondó, precedia por una perinteresante charra sobre la diferencia qu’echar la sidre marca na cultura asturiana de la sidre, espertó l’interés d’un públicu entregáu qu’aprovechó la ocasión pa sacase semeyes col campeón y pidi-y que roblara’l so llibru.
Casi de siguío, desendolcóse nel interior del espaciu Unesco una degustación de productos d’escanda con Sidra Riestra Brut, una combinación que sosprendió a toos y que fixo que munchos volvieren pa casa col enfotu de aprender más sobre la espelta ya incorporala a la so alimentación.
Mientres se desendolcaben les actividaes de los adultos, los neños entamaron tamién el so programa d’actividaes ellaborando un paxu en directu y rematada esa actividá pequenos y mayores xuniéronse nun interesante y participativu taller d’echar sidre a cargu del Campeón Salvador Ondó.
Les siguientes en tomar l’escenariu fueron el grupu ‘Soi panderetera’, qu’en namás un par de cantares punxeron a baillar a los sos espectadores, mientres un pocu más allá los pequeños (y los non tan pequenos) pasábenlo en grande con carreres de sacos y tiru cuerda.
La hora de preslle llegó casi por sorpresa, dexando a toos con ganes de más –más sidre, más baille, más xuegos, más música- pero afortunadamente inda queda tiempu hasta’l domingu. Ensin escaecer que mañana celebraráse peles cais de Xixón y Llaviana el Sidracrucis, la procesión más sidrera.
Convidámosvos a consultar el nuesu programa pa güei
Vienres 18 d’abril
- 12:00 Apertura de puertes
- 13:00 – Espaciu Unesco
- Tastia guiada de sidra letona a cargu d’Anzu Fernández
- 14:30 Exterior
- Recepción Sidracrucis
- 15:00 – Espaciu Unesco
- Conferencia alderique “Retos actuales del sector sidreru”
- 16:00 – Espaciu Unesco
- Presentación del Llibru/vidiu Muyeres qu’echen sidre,
- Tastia d’ Alimentos del Paraisu – choscu de Tineu (fasta completar aforu)
- 17:00 – Esterior
- Mayada pa la reciella
- 17:00 – Espaciu Unesco
- Tastia guiada de les tres mejores sidras de la Primer Sidre l’Añu (La Morena, Prau Monga y Cabueñes)
- Tastia d’Alimentos del Paraisu – marañueles (fasta completar aforu
- 18:00 – Escenariu principal
- Monólogos Sergio Buelga
- 19:00 – Escenariu principal
- Actuación: Un de Grau
- 21:00 Preslle
- Tol díi: Sidre a llibre disposición en barra y en toneles, Banda de gaites El Gumial, Xuegos infantiles, esportes tradicionales y talleres d’artesanía, barra de comida.
