Esta fin de selmana cellébrase la tradicional espicha de Brañella que fina coles xornaes gastronómiques “Espiches de Primavera” entamaes en Samartín del Rei Aureliu.
LA SIDRA.- La espicha de Brañella cellébrase los díis 13, 14 y 15 y con ella finen les xornaes gastronómiques “Espiches de Primavera” entamaes por varies asociaciones del Valle La Güeria de Carrocera (SRA) y que vienen cellebrándose dende’l mes de marzu con una perimportante participación, que va a más añu ente añu.
Én Brañella xunciráse gastronomía, ambiente asturianu, música’l país, tonada, senderismu, btt y xuegos tradicionales pa toles edaes. Los amantes de la ñatura podrán conxugar gastronomía col senderismu y la bicicleta montañá, yá que’l Valle La Güeria ufre varies rutes pa esfrute de los amantes d’estos esportes; y a la fin de la xornada, dir d’espicha a gociar de la bona sidre y el meyor ambiente.
Les espiches de les cuenques son de les más tradicionales qu’hai, y a más d’un asturianu avezáu a les espiches de llagares industriales, chocará-y ver comu la sidre d’espicha nun s’echa dende’l tonel (que polo xeneral son piqueños), sinon que s’echa direutamente a la botella, y de la botella al vasu, ensin echar, comu si de vinu se tratara. La tradición ye asina.
