Nel so percorríu falarán col Ministru irlandés de Mediu Rural y col Presidente de la Cámara de Comerciu, entregando-yos cartes oficiales de los correspondientes organismos asturianos.
Miembros de la directiva de la Rede Europea de Ciudaes de la Mazana y la Sidre -Cider Cities- ente los que s’alcuentra el sociu fundador y presidente de la Fundación Asturies XXI, Marcos Abel Fernández, tendrán güei los primeros alcuentros oficiales dientro d’un apretáu programa de visites institucionales coles autoridades irlandeses.
El primer aconceyamientu sedrá con Jerry Buttimer, Ministru de Mediu Rural y Desendolcu Comunitariu d’Irlanda, a quien entregarán una carta del so homónimu asturianu, el Conseyeru de Mediu Rural y política Agraria Marcelino Marcos Líndez.
Esta mesma tardi reuniránse con Moira Murrell, CEO of Cork County Council, con quien aldericarán de les posibilidaes de colaboración pente los integrantes de Cider Cities.
La selmana que vien continuarán colos aconceyamientos, entregando al presidente de la Cámara de Comerciu de Cork una carta del presidente de la Cámara de Comerciu xixonesa, xuniendo venceyos pente les dos entidaes. Finalmente el martes 25 falarán con Clir Dan Boyle, alcalde de Cork, na casa conceyu.
El caberu actu nel que participarán tien un especial conteníu simbólicu: llantarán un pumar nun tarrén públicu de Carrigaline.
Esti viaxe valdrá pa reforciar el venceyu pente Asturies ya Irlanda, que tien nel conceyu de Cork una de les sos principales fasteres sidreres, potenciando l’avance del sector sidreru europeu comu una comuña.
