La sidre nel Díi d’Asturies en Casu

L’echáu y esibición del nuesu productu más emblemáticu nun podíes dexar de tar presentes

LA SIDRA.- La cultura popular asturiana sedrá un añu más la gran protagonista del Díi d’Asturies, qu’esta fin de selmana tendrá a Casu como cientru neurálxicu de la cellebración. Y al falar de cultura popular, por supuestu que la sidre tará más que presente. El sábadu programóse una masterclass d’echáu de sidre y una esibición de campiones. Amás, na Pumarada de la Torre tara asitiada l’Amuesa y talleres de llabores tradicionales. Per otru llau, el Mercáu tradicional y la Feria de productos asturianos istalaránse na Plaza l’Ayuntamientu y na Plaza’l Mercáu.

La fin de selmana festiva abriráse’l vienres col conciertu d’Anabel Santiago na Plaza l’Ayuntamientu. L’actuación de Rodrigo Cuevas tendrá llugar el sábadu y el de Petit Pot el domingu. El Coru Mineru de Turón, Luis Núñez y los Folganzanes -sí, los de “Dame un culín collaciu”-, y los conciertos de tonada de l’Asociación d’Intérpretes de Canción Asturiana (AICA) y de l’Asociación de la Canción y el Folklor Valle’l Nalón, completen la ufierta musical del programín. L’amuesa de folclor cuntará cola actuación del Grupu Folclóricu Blimea y la Banda Gaites Garulla, qu’amás animarán Casu con pasacais demientres los dos díis.

En cuantes a actividaes n’equipamientos, Casu abrirá al públicu demientres los dos díis, de baldre y con visites guiaes con places llimitaes, la Ilesia de Tañes, El Muséu de l’Apicultura, el Muséu de la Maera y el Cientru d’Interpretación del Parque Natural de Redes. Y tamién habrá esporte entamáu pol Clú Esporte Rural Guimarán, Equipu Monte Areo, -entrevistaos nesta revista-, y el Grupu d’Esporte Rural 6 conceyos.