Los hosteleros de Villaviciosa alcordaron col Conseyu Regulador de la DOP Sidra de Asturies ufiertar los productos amparaos so la Denominación d’Orixe Protexida como primer opción en sidre natural a quien visiten los sos establecimientos. D’esta miente, la villa maliaya convíertese na quinta localidá, tres Tazones, Llastres, Candás y Llanes que se compromete cola marca DOP Sidre d’Asturies.
LA SIDRA.- Pa simbolizar esta alianza, una gran representación de propietarios de sidreríes citóse na Plaza’l Güevu pa echar un culín de sidra y reflexar, asina, el so compromisu con esti productu ellaboráu con mazana 100% asturiana y tolo que supon de xeneración de bayura y emplegu nel país. Al actu tamién allegó l’alcalde Villaviciosa, Alejandro Vega.
“Prestaríame agredecer al Conseyu Regulador de la DOP Sidre d’Asturies esta iniciativa que ta llevando a cabu. Nel itinerariu marcáu nun podía faltar la capital mazanera. Xunímosnos con tola fuercia a esta campaña. Esti ye’l camín p’aidar a tol sector primariu asturianu, primordial nel nuesu conceyu”, reflexó l’edil.
“Lo que queremos ye ser profetes na nuesa tierra y dar puxu al consumu. Tresllada-yos que si consumimos sidre d’Asturies aidamos a los pumareros y a protexer el paisaxe. Lo que buscamos con estes acciones ye la diferenciación con otres sidres ellaboraes con mazanes d’otres rexones y otros países. Tenemos de tirar polo nueso p’alzar el porcentaxe de sidre d’Asturies consumío nel nuesu país, qu’esti añu ye del 20% con respeutu a la totalidá de la sidre que se viende n’Asturies. Faemos un llamamientu a los asturianos por que tomen concenxa a la hora pidir una botella sidre”, reflexó’l xerente del Conseyu Regulador de la DOP Sidra de Asturies, Daniel Ruiz.
“Tamos comprometíos con esta causa. Nel nuesu establecimientu siempres aconseyamos a los nuesos veceros que consuman sidre con denominación d’orixe, ello ye, ellaborada con mazana cien per cien asturiana”, amestó Airín Castañeda, en representación de la Sidrería Covadonga.
Los establecimientos de Villaviciosa representaos nel brinde d’esta mañana fueron: Casa Meri, El Congresu, La Capiya, El Portal, Bedriñana, Garitu, El Gallineru, Café Vicente, El Roxu, Casa Cortina, La Chispa, El Charrán, La Tierrina, Covadonga, El Benditu, La Ballera, Sidrería Villaviciosa y El Escorial. Hai de destacar qu’a mayores de l’aición llevada a cabu esti xueves, Villaviciosa va ser escenariu del rodaxe del vidiuclip del cantar del branu que tolos años llanza la DOP Sidre d’Asturies como una de les sos aiciones promocionales.
