Menú ricu y baratu en Bodegas Anchón

Escelente menú del día por namás 11€ en Bodegas Anchón – la sidre aparte- consistente en una saborgosísima sopa fecho col caldo de los garbanzos, qu’esfrutamos doblemente por ser el díi de los pocos lluviosos y frios d’esti entamu de primavera, colo que la sopa entró de maravía, esconsoñando les papiles y caleciendo’l cuerpu.

Por supuestu, depués de la sopa traxéronmos el correspondiente cocíu garbanzos, tienros ya intensos, con bon compangu y caldu consistente.

Darréu, y siguiendo colos saborgos intensos, decidímonos por unos escalopinos al Cabrales, de rebozu finu y la carne al puntu, acompangaos d’una ración curiosa de patates frites.
De postre, una tarta de fresa casera pa rellambese.

Too ello, bien regao cola sidre del xixonés Llagar Acebal perfechamente echao en tiempu y forma pola muyer meyor clasificada nel Campeonatu d’Echadores, siendo la segunda de la categoría Sub 25, Isabella Padrón.