“Esti ye’l turismu que Xixón y Asturies precisa, respetuosu cola identidá y la cultura asturiana”
La Primer Sidre l’Añu cellébrase del 17 al 20 d’abril nel Recintu Ferial Luis Adaro, concretamente nel Pabellón Asturies y nes zones abiertes d’alrodiu; anque’l so furrulamientu y preciu va ser el mesmu d’años anteriores, la ufierta d’actividaes y espacios multiplícase nesta edición
LA SIDRA – Esta mañana tuvo llugar na Casa Paquet la rueda de prensa na que se presentó’l programa y actividaes de la XV Primer Sidre l’Añu, que va abrir les sos puertes el xueves 17 a la una del mediudía col pregón al cargu de Luis Benito García, Presidente de la Cátedra de la Sidra y principal impulsor de la declaración de Patrimoniu Inmaterial de la Humanidá pola Unesco
Na mesma tuvieron presentes Marcos Abel Fernández, Presidente de la Fundación Asturies XXI, la Vicealcaldesa Ángela Pumariega, Pedro López Ferrer, Vicepresidente de la Cámara de Comercio -entidad cofundadora de Cider Cities-, Antonio Migoya, Secretariu Xeneral de la Fundación Caxa Rural –entidá collaboradora- y Alfonso Prado y Pedregal, del llagar La Morena, que la so sidra va ser –per segundu añu consecutivu y cuartu en total- la oficial d’esta XV PSLA
Abrió la vez d’intervención Ángela Pumariega, quien recordó que’l Conceyu de Xixón otorgó’l calter d’eventu de raigón social a la Primera Sidre l’Añu, constituyéndose en sede estable del mesmu y repitiendo el compromisu de l’área de turismu con él. Resaltó la importancia de la PSLA no que cinca a visibilización de la tradición, la cultura y la esencia asturiana; “esta cultura sidrera ye lo que nos estrema, la sidra defínenos, la sidra represéntanos” afirmó.
Pela so parte, el Vicepresidente de la Cámara de Comerciu de Xixón, Vicente Gómez Ferrer, amosóse contentu pola realización del eventu nel recintu ferial y aportunó na so disposición a faer lo posible pa poner a disposición del mesmu toles facilidaes qu’ufierta esi espaciu, agradeciendo a los organizadores el so llabor de defensa de la Cultura Asturiana de la Sidra y de “tolo que nos xune a los asturianos, porque la sidra fala de nós, del nuesu calter, de como somos”
Na so intervención Marcos Abel Fernández incidió en que la Primera Sidre l’Añu ye una espicha tradicional, “na que s’axunten families, grupos d’amigos, que vienen probar la sidra nuevo y a pasalo bien, y que cunta con tolos elementos necesarios pa ello, con gaita, tambor, tonada, xuegos pa la reciella, productos gastronómicos asturianos, esportes tradicionales, mayada de sidra, concursos d’echadores aficionaos… Una espicha que nació colos oxetivos de desenvolver la cultura asturiana de la sidre, recuperar les espiches de Selmana Santa y la sidre sobro la madre”
Destacó tamién qu’esti ye un añu bien especial, el primeru nel que la Cultura Asturiana de la Sidre cunta cola reconocencia de la UNESCO como Padremuñu de la Humanidá, daqué que se va reflexar non solo na elección de Luis Benito García, director de la Cátedra de la Sidra de la Universidá d’Uviéu y un de los principales responsables d’esta reconocencia internacional, pa dar el pregón, sinón que se va cuntar dientro de la Primer Sidre l’Añu con un Espaciu Unesco, un espaciu llendáu nel qu’a lo llargo de los cuatro díes van desenvolvese intervenciones en redol a la cultura asturiana de la sidra: Presentaciones de llibros, proyección de videos, charres, conferencies, talleres…
Esta edición ye especial tamién porque nella fadráse entrega de los diplomes correspondientes a la Primer Promoción de Sumilleres de Sidra, cursu impartíu pola Fundación Asturies XXI en colaboración col CIFP d’hostelería y turismu de Xixón.
Tamién ye reseñable la programación musical del eventu, nel qu’amás de la Banda Gaites El Gumial, que van actuar tolos díes, va cuntase con actuaciones de grupos como Soi panderetera, Ún de Grao con cancios de chigre, Rollu Folk, David Varela con cantares del llagar y el monologuista modernu Sergio Buelga.
Marcos Abel fixo notar que, magar ser esti un eventu pensáu p’asturianos, centráu na nuesa cultura, qu’utiliza l’asturianu como llingua vehicular y que ye participativu, non un espectáculu cara al turismu, curiosamente atrai a muncha xente de fora que busquen un turismu de calidá, que busca integrase cola población llocal, conocer, compartir y participar na nuesa cultura, “Esti ye’l turismu que Xixón y Asturies precisa, respetuosu cola identidá y la cultura asturiana”.
Tamién señaló que, precisamente cuando tol mundu mira a Asturies pola so Cultura de la Sidra, ésti ye l’únicu eventu centráu nella de tola selmana santa asturiana.
Na so intervención el Presidente de la Fundación Asturies XXI destacó’l potencial económicu de la sidra y como nesti eventu tratar de que revierta na hostelería de Xixón, presentando productos gastronómicos asturianos y cerrando les sos puertes a les nueve de la nueche, pa que los visitantes alleguen a la hostelería llocal; pa potenciar esto apurrirán un planu de sidreríes de Xixón.
Na PSLA tamién se va dar un pasu alantre na sostenibilidá, carauterística importante na sidre asturiano, que lleva más d’un sieglu reutilizando botelles. Non solo van aplicase tolos principios básicos para embrivir la so buelga, sinón que per una parte los qu’alleguen el domingu en bicicleta van tener la entrada de baldre y pol otru van recuperase tanto corchos como vasos de plásticu para da-yos usu nos Sidrocoles, qu’imparten talleres de cultura sidrera tol añu polos colexos de Asturies, reutilizándolos como material pa manualidades y xuegos o utilizándolos de tiestos na creación d’una pebidal.
El furrulamientu de la PSLA va ser el d’otros años, con una pulsera identificativa previu pagu de diez euros a la entrada que permite probar tola sidra que se quiera de los 40 llagares participantes, asina comu participar en toles actividaes.
Ente tola sidra que va tar disponible destaca la de La Morena, sidra oficial de la XV PSLA dempués de ganar nuevamente’l concursu de la Meyor Primer Sidre l’Añu. Alfonso Prado y Pedregal, llagareru de La Morena, declaró sentise arguyosu de consiguir esta reconocencia, “la meyor manera d’empezar la temporada”. Ye la cuarta vegada que La Morena consigue esti galardón, siendo’l llagar más vegaes premiáu.
Otru de los eventos importantes que se engloben dientro de la Primera Sidre l’Añu ye’l Concursu de Sidre Caseru fecho en Maera, que va tener llugar el domingu 20 y pa’l que pue llevase la sidre a concursu mientres tola selmana santa.
Amás, queremos destacar:
- Ufierta de sidra duce (ello ye, ensin alcohol)
- Información multillingüe. Ca añu ye mayor el númberu de visitantes estranxeros, tanto persones individuales como medios de comunicación; poro cuntamos con un equipu d’atención que, amás del asturianu y l’español, informa n’inglés, francés, italianu y alemán.
- Menú vexetarianu. La nuesa magnífica parrilla cunta, como vien siendo vezu nos caberos años, con un menú vexetarianu, dando respuesta asina a una demanda ca vuelta más xeneralizada ente los asistentes al eventu.
- Espaciu Cardioprotexíu. Cuntamos col equipamientu necesariu (desfibrilador), y el personal médicu cola formación precisa, p’ ‘atender de manera eficaz una parada cardiaca hasta la llegada de los servicios médicos d’emerxencia. Con esta midida adelantramos a les disposiciones esistentes pa esti tipu d’eventos a nivel européu, y apurrimos una seguridá a toos los nuesos visitantes.
- ¡Bebi con xacíu!. Anque la llexislación española entá nun lo esixa, asumimos los principios europeos nos que l’anunciu d’actividaes rellacionaes con bébores alcohóliques lleven un llamamientu al so consumu responsable y moderao, de tala forma que l’eslogan “Bebi con xacíu. Ye la nuesa cultura. Ye la to responsabilidá” va tar presente en tol eventu, recordando, de camín, que la cultura asturiana de la sidre nun ye una cultura de “botellón”, sinón de relaciones sociales.
