Primer Alcuentru de la sidre casero

El Club Sierense de Amigos de la Manazana –CSAM- entama’l primer alcuentru de sidre casero artesanal

LA SIDRA.- Daquién tenía que facelo, la sidre fecho pa en casa ta nun procesu de reivindicación qu’avanza al empar del so progresivu esaniciu, y el CSAM asume la necesidá de reencadarmar toles iniciatives esistentes anguañu, col oxetu de repensales, encadarmales, y retroalimentales, nun procesu abiertu a la participación de toles presones y organizaciones que viven y sienten esi aspeutu fundamental de la cultura asturiana de la sidre.

En principiu , la fecha de cellebracíón sedrá’l prósimu sábadu 23 d’abril nel Muséu de la Sidre de Nava y tendrá horariu de mañana y tardi, dede les 9:30 a les 19:30 hores, con espicha y visita al Muséu per mediu.

Nesti alcuentru los asistentes cuntarán con un espaciu de 10 minutos pa esponer les llinies xenerales de les sos opiniones y postures principales sobro l’alrodiu de la Sidre Casero y los Concursos, de magar los cualos ellaborarán una recopilación y resume de los principales puntos espuestos polos ponentes de les entidaes asistentes, procediéndose darréu a un debate sobro los temes d’importancia siñalaos polos ponentes de ca entidá.

Los temes propuestos pola organización son:
Concursos de sidre casero / Festivales de sidre casero / Criterios de seleición / valoración de la sidre casero / Formes de dar puxu a l’asistencia de la xente y en particular de la xente mozo / Formación y difusión / Otres suxerencies que ca organización considere importantes

Al final del Alcuentru ellaboraráse un resume de concluxones finales y decisión sobro la continuidá o non d’esta triba d’Alcuentros, periodicidá y rotación de llocalidaes de cellebración