La sidre de Cabueñes, Germán, Huerces, La Morena, Piñera y Prau Monga pasen a la final de la Meyor Primer Sidre L’Añu
LA SIDRA.- El miércoles 9 d’abril cellebraráse la final de la que saldrá la sidre oficial de la XV Primer Sidre L’Añu – Unesco 2025.
A lo llargo d’esta mañana el xuráu, compuestu por seyes persones con Manuel G. Busto y Joaquín Fernández al frente, dambos tastiadores de renombre nel mundiu la sidre, valoró sidres presentaes a concursu nuna duple tastia a ciegues que dio como finalistes a seyesllagares.
A la final, que tendrá llugar a les 18:30 la tardi na sidrería La Montera Picona de Ramón, concurren cincu llagares: Germán (Avilés), La Morena (Viella), Cabueñes (Xixón), Huerces (Xixón) Piñera (Xixón) y Viuda de Angelón (Nava).
Pa la final, el sistema sedrá tamién de tastia a ciegues a duple ronda, siendo les tasties y deliberaciones del xuráu abiertes al públicu, cuntándose cola asistencia de los llagareros que pasaron a la final. Amás del primer premiu, que convierte a la sidre ganadora na sidre oficial de la Primer Sidre l’Añu, que se cellebra del 17 al 20 d’abril, entregaránse dos reconocimientos al segundu y tercer llagar clasificáu; una bones finalizáu’l concursu podrán probase les sidres finalistes.
Esti certame, entamáu pola FUNDACIÓN ASTURIES XXI, ye ún de los concursos de sidre más importantes del país, siendo l’únicu que valora la sidre sobre la madre, ello ye, ensin trasegar ya’l segundu en cuantu a númberu de llagares participante.
Sidre sobro la madre
Dende hai 15 años LA SIDRA y la Fundación Asturies XXI escomenzaron a trabayar pola recuperanza de la sidre ensin trasegar, que práuticamente desapareciere del mercáu pola industrialización de los llagares y l’aplicación xeneralizada de los trasiegos. Ca vuelta son más los llagares que s’animen a comercializar esta triba de sidre y que participen nesti certame.
Concursu XV Meyor Primer Sidre l’Añu
Finales: Miércoles 9 d’abril a les 18:30
Llugar: Sidrería La Montera Picona de Ramón
Convidamosvos a asistir a les delliberaciones del xuráu.
