El discutiniu esiste dende va años, en principiu referíu a qu’en munchos sitios nel comedor nun echaben sidre, pero agora’l discutiniu aumentó: ca vegada son más los chigres que nun cunten con echaor/a, que directamente nun atienden en barra o que namás atienden si va xintase.
LA SIDRA.- Na revista LA SIDRA del mes de xineru ‘Propuestes para’l primer añu UNESCO’ recoyíense una serie de propuestes pa los chigres, y recordábase tamién la llexislación qu’esiste al respeutu de los requisitos d’un establecimientu hosteleru para poder definise como chigre.
Referímosmos en concretu al Decretu 32/2003 del 30 d’abril, d’ordenación de l’actividá nel ‘Principado’ d’Asturies, en que’l so capítulu V rellativu a los chigres establez ente otres custiones que:
- Tien de disponer de los elementos materiales y humanos precisos pal almacenamientu, caltenimientu y echáu de la sidre natural, según la costume asturiana”
- Sedrá “imprescindible que nun esista torga dalguna pa echar sidre nel comedor, siendo emprestáu esti serviciu pol mesmu personal dependiente del establecimientu’.
- “Nun va poder llindase l’echar sidre a determinaes fasteres del establecimientu, teniendo d’emprestase esti serviciu, tanto na zona de chigre como na de comedor”
Fasta onde sabemos ´-y por motivos que desconocemos- esti Decretu del Principáu’ nin s’aplica nin s’aplicó -¿por qué?-, y son munchos los establecimientos qu’ensin cumplir nengunu d’estos requisitos siguen anunciándose como chigres ¿bramente son chigres?
