La Bona Confradería de los Siceratores d’Asturies nomó ayeri a los sos nuevos miembros de méritu y a un mui mozu miembru de númberu, nun actu nel que cellebren l’aniciu de la primavera, na qu’entama a correr la sidre nes espiches.
LA SIDRA.- La ceremonia, que se cellebró nel Muséu de la Sidre d’Asturies, en Nava, empecipió cola interpretación de l’asturianada “Ya llega la primavera” a cargu d’Odón del Paganéu y un saludu del direutor del Muséu, Juan Stové, siguíu pola intervención del alcalde navetu, Juan Cañal, quien lleva abriendo esti actu dende la so primer edición, y foi guiada por Ricardo del Río, que recordó qu’esti ye’l so primer actu dende la declaración de la Cultura Asturiana de la Sidre comu Padremuñu Inmaterial de la Humanidá pola Unesco, y Milio del Nido, que foron glosando y acoyendo a los nuevos confráderes de méritu.
A los nuevos miembros de méritu, reconocios pol so sofitu a la sidre y a la cultura asturiana, púnxose-yos la capa y la montera picona que caracteriza a los miembros d’esta Confradería sidrera, tomándose-yos xuramentu y dándose-yos el preceptivu “golpe de mayu”. Fueron Nisén Ángel Díaz Carazo, comercial de Sidra Castañón y artífice del ritu del hermanamientu de la sidre, l’artista porruana Nieves Gónzalez, l’Ochote Los Ñerbatos y Juan José Tomás, llagareru de Sidra JR, ganadora de la cabera edición del Festival de la Sidra de Nava. Amás de toos ellos, recibióse comu cónfrade de númberu a Iyán Dos Santos Fernández, el más mozu de los participantes na confradería, con namás 14 años pero una mui sincera pasión pola cultura sidrera asturiana.
Nel actu, Nisén Ángel Díaz aprofitó la ocasión pa destacar la trascendencia del momentu que ta viviendo la sidre “tócanos a nosotros defender una cultura qu’agora nun ye nuestra sola, ye padremuñu de tola humanidá y eso ye algo mui serió”, pero llamó tamién l’atención sobre los riesgos d’esti momentu, faciendo un llamáu a nun confundir cultura con espectáculu y a dar el respetu y atención que merecen “los que realmente saben de sidre, los que viven por, per y de la sidre, agora que ta de moda y cuando nun lo taba”.
Pela so parte, Nieves González, espresó el so agradecimientu y emoción por esta reconocencia, “colo que m’esforcé yo bebiéndola tola adolescencia y hasta agora”.
La imposición de capes del ochote y la presentación de los sos miembros foi llarga, pero prestosa, amenizada cola interpretación de dalgunos cancios y rematada pola intervención de Juanjo, representante de Los Ñerbatos, que llevantó munches rises cola so gracia desplicando cómo se compuso esti grupu, formáu por amigos dende la neñez.
D’últimes foi-y impuesta la capa y la montera de los Siceratores a Juan José Tomás, que foi breve nel so agradecimientu, convidando a toos a esfrutar de la so sidre na posterior espicha que, como nun podía ser d’otra miente, remató el ‘Axuntábense’ nel llagar de Lolina.
Tolos homenaxeaos corcharon en direutu una botella del tonel d’hermanamientu de les sidres d’Asturies que llevaron pa casa d’alcordanza y presllóse l’actu con una actuación de Vicente Díaz y un sentíu ‘Asturies Patria Quería’ canciáu por tolos presentes y acompangáu pola gaita de Pelayo Cuaya.
