La yá mítica sidrería de Villalegre -Avilés- cellebra del 3 al 5 de marzu les Xornaes del Oriciu
LA SIDRA.- La Sidrería Yumay, una de les sidreríes referenciales d’Asturies, que forma parte del ‘llinderu la Sidra‘ d’Avilés, recupera tres l’andanciu Covid-19 les sos espectaculares xornaes del oriciu, con unes propuestes gastronómiques impresionantes, y como davezu, con sidre bien echao y bien tratao.
Entamaes pola confradería gastronómica ‘Gastrónomos del Yumay‘, les xornaes naguraránse la nuechi del 3 de marzu, con un actu nel que participará la xunta direutiva de la FECOGA -Federación de Confraderíes gastronómiques- y onde se procederá al nomamientu de Confráderes predilectos de Gastrónomos del Yumay a Juanma Garmendia, Presidente del FECOGA, cuya figura sedrá glosada pol periodista Carlos Cristo, xefe de Comunicación d’Otea, y de Miguel Ángel de Dios, presidente de la Confradería del Desarme d’Uviéu, que sedrá glosáu por Amada Álvarez, presidenta del Clú de Guisanderes. Asina mesmo impondráse-y la Gran Beca d’Honor a Rafael Rodríguez, Comisariu Xefe de la Policía Municipal d’Avilés.
L’actu tendrá llugar na Sidrería Yumay, esti xueves 3 de marzu a les 20:45 hores, con un menú impresionante:
- Paté d’oricios y paté de pexe pa compartir
- Platu d’Ibéricos por presona
- Oricios crudos y cocíos pa compartir
- Quesu Gamonéu con dulce de marmiellu
- Sidre.
El preciu del cubiertu ye de 28 €
Redactor: Marcos Abel Fernández
